اربعه ريشه !!!!!!!!!!!!!؟؟؟؟؟

لقد كنت اصدق كلام الاعلام و الكتب بان مصر هي مهد الوحده الوطنيه و اعتقد ان ذلك كان بسبب انني لا اهتم بهذا الموضوع و لانني نشات في مدرسه راهبات فكنت بحب مدرسيني و هم مسيحيين و عادي و لكن في الشهور الماضيه تغيرت هذه النظره المثاليه الاعلاميه تماما و كان ذلك عن طريق عده مواقف بعيدا عن الاحداث الكبيره مثل حادث الاسكندريه و لكن هذه المواقف كانت شخصيه اكثر و سارويها لكم بالتدريج الزمني:
1-منذ عده اشهر كنت اركب تاكسي و كانت تجلس بجانبي فتاه مسيحيه لا اعرفها و لكنني استنتجت ذلك و كذلك فعل السائق و بعد ان نزلت من التاكسي وجدته يبتسم و يقول لي "اربعه ريشه وللا يهمها" لم ا فهم ما قاله لاول وهله فطلبت منه ان يعيده ظنا انني سمعت خطا فاعاده و لكنني لم افهم فاكتفيت بهز راسي و صمتت ثم بعدها بدقائق بعد ان نزلت من التاكسي و انا افكر فيما قاله و فهمت فهو يقصد بالاربعه ريشه الصليب الذي يطبع على ايدي المسيحين و يقصد ب "وللا يهمها "انها كانت مش محجبه و لابسه كم قصير و حلوه يعني
(على فكره العباره ممكن تكون مشهوره بس انا اول مره اسمعها في حياتي) طبعا انا استغربت بس قلت معلش ده راجل بسيط و معندوش وعي كافي و كل اللي يعرفه بان احنا صح و هم غلط .
2-منذ ايام كنت اسير مع بعض الصديقات فكانوا يبدين تضايقهن من صديقتنا المسيحيه لانها تركتهم لتسير مع صديقه لها مسيحيه ايضا و بداوا يدخلوا الموضوع في الدين و انهم كلهم حيروحوا مع بعض النار و قالت احداهم مع انني احبها و لكنها تعتبرني في الاول و الاخر عدوه لها فحاولت ان اقنعهن ان يلتمسن لها العذر اولا يمكن تكون رايحه معاها مشوار بعدين فيها ايه لما تفضل المسيحيه على المسلميت لسببين
اولا: انا لو مكانهم و عايشه في مجتمع كله مسيحي و الاقليه هم بس المسلمين اكيد حاعمل زيها و افضل ان انا تكون علاقاتي القويه مع الاقليه المسلمين اللي زيي .
ثانيا : في المدارس الحكوميه الاعدادي و الثانوي يضعون المسيحيات في فصل واحد حتي تتوافق حصص الدين فمن الطبيعي ان تزداد علاقتهن ببعض يعني حتى لو انها لا تفرق في المعامله بين المسلمين و المسيحيين فسوف تزداد علاقتها بهم
و في النهايه غيرنا الموضوع و لم يغير احد افكاره و كانت هذه الصدمه الثانيه لي فهؤلاء متعلمات و لا ينفع لهم العذر السابق .
3-الموقف الثالث حدث البارحه و كان هو القشه التي دفعتني لكتابه البوست عن هذا الموضوع فقد كنت اركب انا و نوران تاكسي -برضه-و كانت تركب معنا فتاه مسيحيه طلبت منه ان يوصلها للكنيسه و قد ركبنا معه و كانت هي معه و كان يشغل شريط قرأن و لا اريد ان اظلمه و اقول انه بيعند فيها يمكن بيسمعه دايما المشكله بقى انها برضه بعد ما نزلت قعد يقولنا " رايحه الكنيسه تعمل ايه دي رايحه تاخد ذنوب عالفاضي , دي بتبقى الست عندها ستين سنه و بتروح الكنيسه-قصده انها لسه ماتهدتش للاسلام-"برضه سكتنا مع اني فكرت اناقش بس قلت انا حنفخ في قربه مقطوعه و كانت الثاثه .
و اكتشفت -صحيح متاخر جدا -ان انا لما كنت بنتقد امريكا عشان عندهم تعصب بانواعه-التفاصيل في بوست اخر ان شاء الله و ده مش كلامي-كنت بانتقدنا احنا لان احنا شعب بياكل في بعضه من جوه و تفكير اصحابي ده بيمثل عقليه بنات عندهم 15 سنه يعني ده اللي نشاوا عليه يعني ده تفكير الكبار كمان
و لا اريد ان اعطي صوره للمسيحيين ان احنا كلنا بنكرههم لا يعني انا واحده و اكيد في كتير زيي و اكتر لما بتعامل معاهم بفتكر حديث الرسول (صلى الله عليه و سلم )استوصوا باقباط مصر خيرا فان لهم ذمه و رحمه
بس مشكله الشعب هو برضه الجهل ثم الجهل ثم الجهل ثم التربيه.
عذرا للاطاله